Како неосновани и паушални ги оцени Министерството за транспорт и врски денешните обвинувања од СДСМ, објавувајќи ги јавно деталите и конкретните суми од четирите пристигнати понуди за електричните автобуси.
Од институцијата посочуваат дека иако меѓународниот јавен повик на крајот пропаднал, целиот процес на евалуација бил спроведен строго според законските процедури во земјава.
„Министерството за транспорт ја водеше постапката за набавка на 150 електрични автобуси и електрични полначи во целосно транспарентен процес и целосно согласно Законот за јавни набавки. Согласно процедурата, до Министерството за транспорт пристигнаа 4 понуди кои беа предмет на евалуација. Иако тендерот пропадна, во интерес на јавноста би сакале да ги објавиме понудите и причините за отфрлање на секоја од нив“, соопштуваат од Министерството.
Во официјалната статистика се наведува дека вкупните понуди без ДДВ изнесувале 50.700.000 € за „Актрус“, по 50.600.000 € за конзорциумот „Икарус-ЕВН“ и „Жонг Тонг“, и 59.200.000 € за компанијата „БМЦ“.
„Поединечните цени по автобус без полнач се: Електробус/Икарус: 314 000 €, Актрус/ Кинг Лонг: 324 000 €, Жонг Тонг: 327 000 € и БМЦ: 385 000 €. Од ова се забележува дека сите цени се приближно исти, односно нема разлика од 12 милиони евра. Затоа бараме јавно извинување од СДСМ, во спротивно ќе поднесеме тужба за клевета“, реагираат од таму.
Како причини за дисквалификација се наведуваат главно пропусти во документацијата, како што се невалидни или недоставени банкарски гаранции кај три од фирмите, и пропуст со електронскиот потпис кај унгарско-австрискиот конзорциум.
Од Министерството за транспорт испратија и директна порака до СДСМ со прашање за нивните вистински мотиви зад денешниот настап во медиумите.
„Се наметнува и прашањето зошто во денешната прес-конференција СДСМ излегува во одбрана на кинеска компанија? Имено, дописот кој го покажуваат е од кинеската Актрус/Кинг Лонг, чијашто понуда е невалидна, но и како таква не е за 12 милиони евра поевтина. Дали СДСМ одработува за странски интереси и зошто? Или мотивот е локален и се крие зад локални пробисвети и криминалци? Тоа се прашања за СДСМ“, стои на крајот од реакцијата.