Министерката Весна Јаневска изјави дека сите издржани забелешки кои што ќе бидат дадени на новиот закон за високо образование ќе бидат земени предвид пред тој да биде затворен и пуштен во владина процедура.
„Во понеделник законот ќе биде затворен и ќе биде даден во владина постапка. До понеделник сѐ што е сериозен приговор и сѐ што е стигнато веќе ќе се разгледа“, рече министерката.
„Во изминатиот период од академската заедница увидоа дека многу од забелешките кои ги дадоа се прифатени. За некои од нив јас лично не се согласував, но комисијата одлучи дека треба и ние ги прифативме“, додаде Јаневска.
Таа вели дека ред во оваа сфера мора да се стави бидејќи, како што истакна, во изминатиот период биле констирани многу нерегулатности.
„Ќе ве потсетам дека ние во изминатиот период затворивме таканаречени 14 приватни институти“, рече министерката.
„Сите кои работат чесно и професионално не треба да се плашат дали ќе ги исполнат условите од законот“, додаде Јаневска.
„Не се критериумите нешто што министерот, работната група арбитрарно ги измисли. Ние направивме сериозна анализа на многу закони во Европа и надвор од Европа“, рече таа.
„Високообразовните установи во прв период после стапување на сила на законот можат да си ангажираат луѓе кои исполнуваат услови кои ќе бидат вработени, на еден институт, а дополнително ќе работат кај нив“, додаде министерката.