Премиерот Христијан Мицкоски денеска од Општина Илинден објави дека условите се исполнети да ги намали акцизите за дизелот за 4 денари, а на бензините за два денара по литар. За утре во 11 часот е закажана седница на Владата за донесување на мерки за заштита од поскапувањето на горивата.
„Берзата за нафтата се затвори во четвртокот и нашите калкулации покажуваат дека дизелот требаше да поскапи некаде околу 7 денари, а бензините 1,5 до два денара. Со промената на акцизите претпоставувам дека цената на дизелот во понеделник ќе се коригира за околу 3 денари“, истакна Мицкоски.
„Имајќи предвид дека полека но сигурно истекува попустот што го дава Окта од 3 денари за дизелот ќе ги обновиме разговорите со нив да видиме дали ќе го продолжат попустот и понатаму“, изјави тој.
„Доколку го пропдолжат понатаму ќе нема зголемување за дизелот од максималната цена што ја утврдува Регуалаторната комисија за енергетика. За бензините значи дека ќе поевтинат околу половина денар и доколку Окта го продолжи попустот од два денара за литар тоа значи дека ќе имаме повторно намалување за 2,5 денари на цената на бензините“, додаде Мицкоски.
„Намалената акцииза ќе влијае со десетици милиони евра на Буџетот, но во Буџетот има доволно средства заради домаќинското работење“, истакна тој.
„За уште две недели ќе продолжи и мерката за намалено ДДВ за горивата од 10 проценти. За понатаму ќе се следи состојбата и ќе се реагира навреме“, заклучи Мицкоски.