Реформата во јавната администрација мора да започне од највисоките раководни позиции, бидејќи само професионални институции можат да испорачаат квалитетни услуги за граѓаните, истакна министерот за јавна администрација, Горан Минчев.
За време на гостувањето во емисијата „Само Интервју“ на Канал 5 ТВ, тој појасни дека новото законско решение за високи раководители воведува целосно поинаков систем за избор на директори, државни секретари и други раководни позиции во најважните институции.
Со новиот закон се предвидува воведување на јавни конкурси, повисоки критериуми, како и задолжително тестирање и проверка на компетенциите, со цел изборот на кадри да се базира исклучиво на квалитет и професионалност.
Како една од долгогодишните слабости во државниот систем, Минчев ја посочи практиката на долготрајни вршители на должност, каде што одредени лица со години останувале на менаџерски позиции без спроведена целосна процедура.
„Не може ВД директор да стане трајно решение. Вршител на должност мора да биде краткорочна состојба, а не начин за избегнување на јавен конкурс“, нагласи Минчев.
Посебен сегмент од најавената реформа ќе опфати и сериозна рационализација на управните одбори во институциите, каде што се воведува ограничување и намалување на бројот на членови на три лица.
„Имавме институции со пет, седум, девет членови на управни одбори. Прашањето е дали навистина толкав број луѓе се потребни за ефикасно управување или системот создавал непотребни трошоци“, рече Минчев.
Како една од клучните алки во процесот, министерот го посочи новиот Закон за организација и работа на органите на државната управа (ЗОРОДУ), со кој треба да се постави поефикасна и пофункционална структура на институциите.
Од Министерството за јавна администрација додаваат дека крајната цел на овие реформи е создавање професионални институции, одговорни раководители и администрација која нема да биде товар, туку вистински сервис на граѓаните.