Македонија мора да најде решение за европскиот пат, но не решение кое ќе отвори нови прашања за македонскиот идентитет, историја и јазик, порача министерот за јавна администрација и генерален секретар на Движењето ЗНАМ, Горан Минчев.
За време на своето гостување во емисијата „Само Интервју“ на Канал 5 телевизија, Минчев посочи дека клучното прашање не е само дали Бугарите ќе бидат внесени во Уставот, туку што ќе се случува по тој чекор.
„Хипотетички, утре да ги внесеме Бугарите во Уставот. И што следно? Ако следното барање биде Гоце Делчев? Има ли Македонец кој ќе се согласи дека Гоце Делчев не е Македонец?“ праша Минчев.
Тој нагласи дека државата не може да прифаќа процеси без цврсти гаранции дека по едно исполнето барање нема да следуваат нови условувања.
„Ние имаме ситуација каде што од бугарска страна постојат ставови дека Македонците постојат по 1945 година или дека македонскиот јазик е дијалект на бугарскиот јазик. Тоа не се само историски прашања, туку прашања што го допираат темелот на македонскиот идентитет“, рече Минчев.
Генералниот секретар на ЗНАМ се осврна и на актуелните политички дебати околу историските факти и жртвите од минатото, упатувајќи критики до опозицијата.
„Пред неколку дена бев во Ваташа, каде што оддадовме почит на 12-те младинци, жртви на едено тешко историско злосторство. Тоа било масакр, трагедија која народот не ја заборава. И замислете перверзија. Венко Филипче и СДСМ полагаат цвеќе таму, а во исто време велат дека ако Бугарите се внесат во Уставот, треба да се признае дека биле „бугарски администратори“, а не окупатори.“ истакна Минчев.
Според него, европскиот процес не смее да се претвори во прифаќање на тези со кои директно се оспорува македонската посебност.
„Не може да се бара од нас да прифатиме дека нешто што е дел од нашата историја и идентитет е предмет на преговарање. Ние мораме да најдеме начин да излеземе од оваа состојба, но тоа не значи да излеземе по секоја цена. Македонија мора да оди кон Европската Унија, но како рамноправна држава, со свој јазик, историја и идентитет“, порача Минчев.