ВМРО-ДПМНЕ останува на ставот дека дијаспората треба да може да гласа електронски или по пошта, а партијата е подготвена да го поддржи и јавното финансирање на политичките партии, предлог што го поднесоа Левицата и ДУИ. Ова го изјави потпретседателот на Собранието и претставник на ВМРО-ДПМНЕ во работната група за изборни реформи, Антонијо Милошоски.
Милошоски посочи дека ВМРО-ДПМНЕ ќе учествува во процесот со цел да се усогласи Изборниот законик со препораките на ОБСЕ/ОДИХР и да се постигне што поширок политички консензус.
Како проблем го посочи отсуството на СДСМ од процесот, како и несогласувањата околу средствата за политичко рекламирање во изборните кампањи.
Во однос на гласањето на дијаспората, Милошоски порача дека треба да се овозможи полесен начин на остварување на избирачкото право преку електронско или поштенско гласање.
Тој потврди и дека ВМРО-ДПМНЕ ќе го поддржи предлогот за една изборна единица доколку за тоа се постигне политички консензус.
„Ние и на претходните разговори како ВМРО-ДПМНЕ го искажавме нашиот став дека сме за една изборна единица. Доколку се постигне консензус, ние немаме никаков проблем да има една изборна единица“, изјави Милошоски.