Околу 30.000 шишиња врвно вино во вредност од пет милиони евра се украдени изминатиот викенд од магацин на познатата италијанска винарија „Маркизи Антинори“. Компанијата соопшти дека станува збор за организиран грабеж и ги предупреди купувачите да бидат внимателни со понудите кои не доаѓаат од официјалните продажни канали.
Според соопштението на компанијата, меѓу украдените производи се наоѓаат меѓу 8.000 и 10.000 шишиња „Солаја“, една од најбараните италијански етикети, како и вина „Тињанело“ и „Гуадо ал Тасо“. Малопродажните цени на овие вина започнуваат од 150 евра, додека најретките берби достигнуваат вредност од неколку илјади евра за шише.
Од винаријата со седиште во Фиренца информираат дека безбедносните камери снимеле седум маскирани мажи кои влеголе во магацинот во Кортона, ги онеспособиле алармните системи и натовариле илјадници гајби во два камиона. Грабежот бил откриен во понеделникот наутро кога вработените дошле на работа, а полицијата работи на расчистување на случајот кој е дел од зголемениот бран кражби што ги погодуваат италијанските винарии.