Премиерот Христијан Мицкоски, преку објава на социјалните мрежи, упати честитка до православните верници по повод големиот празник Богојавление – Водици. Во својата порака, тој го истакна значењето на духовната чистота и меѓусебното заедништво како темели на општеството.
„Богојавление е празник на откровението, на прочистувањето и на обновата. Водици носи силна порака за верата, за храброста и за подготвеноста да се оди по исправниот пат, дури и кога тој е тежок“, стои во честитката на премиерот.
Мицкоски нагласи дека овој ден е потсетник за моќта на заедницата кога е обединета околу вредности кои ги надминуваат поединците. Посебен акцент стави на младите, посочувајќи дека нивната смелост е потсетник дека иднината се гради со карактер и почит кон традицијата.
„Да останеме верни на вредностите што нè држат исправени и обединети и да продолжиме да ја градиме државата со чесност, солидарност и грижа за заедничкото добро! За многу години!“, порача Мицкоски.