Премиерот Христијан Мицкоски го коментираше барањето на опозициската СДСМ за распишување локален референдум за отворање на рудникот за антимон во Крива Паланка, потенцирајќи дека иако правото на референдум е уставно загарантирано, самиот проект има големо стратешко значење за државата и локалниот регион.
Мицкоски изрази изненадување од ставот на раководството на СДСМ, посочувајќи дека тој е во целосна спротивност со мислењето на нивниот градоначалник во Крива Паланка. Според премиерот, градоначалникот го поддржува овој проект, гледајќи во него можност за економски просперитет на крајот кој традиционално се потпира на рударството.
„Овој проект е дел од стратешкото партнерство со САД и е делумно финансиран од нивна страна. Мора да ги исполнува сите услови за заштита на животната средина и безбедност – за тоа лично гарантирам јас, а гарантираат и инвеститорите“, истакна Мицкоски.
Премиерот додаде дека во неговите разговори со локалниот градоначалник, заклучокот бил дека проектот е од стратешко значење, но истакна дека Владата нема да го спори правото на опозицијата да бара изјаснување на граѓаните, доколку тоа е нивна политичка агенда.