Премиерот Христијан Мицкоски денеска ја посети Клиниката за хируршки болести „Св. Наум Охридски“ (поранешна Градска болница) по повод набавката на нова апаратура, вклучувајќи и магнетна резонанца, и најави сериозни реформи во здравствениот систем.
Мицкоски нагласи дека во здравството се вложува повеќе од една милијарда евра, што е двојно повеќе од периодот на ковид-кризата (околу 500-550 милиони евра).
„90 милиони денари сепак не е малку, не е ни многу, но не е ни малку, имајќи предвид дека речиси ништо не е правено, не со години, со децении, само приказни се кажувани,“ рече Мицкоски.
Премиерот најави дека претстојат сериозни структурни и квалитативни реформи со цел за неколку години да има „комплетна нова претстава во здравството“. Тој истакна дека и покрај огромните вложувања, сè уште постојат проблеми и девијантни појави.
Мицкоски ги повика граѓаните да се охрабрат и да достават докази за „здравствените мешетари“ кои го рушат имиџот на Клиниката, нагласувајќи дека Владата има алатки за да ги санкционира.
Во однос на реконструкцијата на Клиниката, премиерот посочи дека е поддржувач на планот на директорот, но дека се соочуваат со проблеми бидејќи зградата е споменик на културата, што бара посебни правни документи за интервенција.