Владата ќе обезбеди максимална поддршка за домашните компании чие производство е доминантно наменето за странските пазари, најави премиерот Христијан Мицкоски при посетата на компанијата „Макпрогрес“.
Тој изрази импресионираност од развојот на компанијата, која успеала од семеен бизнис да прерасне во регионален гигант со промет од над 40 милиони евра и да стане еден од темелите на македонската кондиторска индустрија.
Премиерот потенцираше дека државата мора да ги стимулира ваквите стопански капацитети кои се сериозен двигател на економијата.
„Ние како Влада се разбира ќе сториме сè што можеме за да помагаме ваков тип на бизниси, бидејќи околу 80-тина проценти од вкупното производство е практично производство наменето за извоз.“ – изјави Мицкоски.
Тој додаде дека „Макпрогрес“, без разлика дали настапува преку својот бренд „Винчини“ или како приватен бренд, пласира огромно мнозинство од своите производи надвор од државата.
Притоа, премиерот упати честитки до менаџментот и до сите 670 вработени во компанијата кои секојдневно придонесуваат за овој голем успех.
Владата веќе ги разгледала и нивните идни развојни планови.
„Ги слушнавме амбициите, целите и ние како Влада ќе сториме сè да помогнеме, да бидеме додадена вредност во делот на реализирање на тие амбиции, цели за следниве 5 години.“ – порача Мицкоски.
На крајот, премиерот посака во иднина во Македонија да има уште повеќе вакви успешни инвестиции.