Премиерот Христијан Мицкоски денеска упати силна порака по повод пуштањето во употреба на новиот енергетски проект во главниот град. Тој истакна дека оваа инвестиција од околу 22 милиони евра не е само бројка, туку стратешки чекор кој ќе овозможи Скопје непречено да се развива во наредните две децении.
Според премиерот, со подобрувањето на напонското ниво од 110 киловолти, драстично се зголемува надежноста на мрежата.
„Оваа инвестиција ќе отвори перспектива за следните 20-тина години да одговори на сите енергетски предизвици и потреби за развој на Градот Скопје. Нашата цел е јасна – сакаме Македонија да биде енергетски хаб во регионот“, порача Мицкоски.
Тој упати благодарност до ресорните министерства за транспорт и енергетика, како и до компанијата ЕВН, нагласувајќи дека ваквите проекти се неопходни за прифаќање на нови производствени капацитети во иднина.