Премиерот Христијан Мицкоски денеска во Скопје му посака добредојде на претседателот на Швајцарската конфедерација, оценувајќи ја Швајцарија како еден од најзначајните партнери на земјава во развојната соработка.
Во рамки на посетата се одржала и работна средба на која, покрај високата швајцарска делегација и претставници на македонската Влада, присуствувала и домашната бизнис-заедница. Фокусот на разговорите бил ставен пред сè на економските перспективи.
„Разговаравме за сите можности, за предизвиците, но и за сето она кое нѐ поврзува и како сето тоа да го зголемиме и засилиме во периодот којшто следува. Убеден сум дека нашите билатерални односи ќе го достигнат нивото кое го очекуваме, посебно во делот на економската соработка и трговската размена“, истакна Мицкоски.
Премиерот од свое име, од името на Владата и од името на македонските граѓани, изрази голема благодарност за целокупната помош и поддршка што Швајцарија континуирано ја дава на нашата држава, најавувајќи интензивна работа за подигнување на билатералните односи на уште повисоко ниво.