Бројот на новородени во Македонија за само седум до осум години е намален за околу 7.000 до 8.000 деца годишно, а демографскиот пад е главната причина за сè помалиот број ученици и затворањето училишта, изјави премиерот Христијан Мицкоски.
Според податоците што ги изнесе, во 2025 година во земјава се родиле околу 15.650 деца, додека во годините пред пандемијата бројот на новородени се движел меѓу 22.000 и 23.000 годишно.
Мицкоски направи и пресметка според која намалувањето за 7.000 деца, доколку во една паралелка има по 20 ученици, значи околу 350 паралелки помалку, односно капацитет што одговара на приближно 70 училишта со по пет паралелки.
Според него, демографијата учествува со околу 90 проценти во проблемот со намалувањето на бројот на ученици, додека дополнителен фактор е иселувањето.
Министерката за образование и наука Весна Јаневска претходно информираше дека годинава 24 училишта се привремено затворени. Дел од нив останале без ниту еден ученик, а во други имало многу мал број деца кои биле префрлени во најблиските училишта.
Мицкоски најави дека Владата ќе работи најпрво на стабилизирање на падот на населението, а потоа и на создавање услови за зголемување на бројот на жители, посочувајќи дека со слични демографски проблеми се соочуваат и други европски држави.