Четири случаи на мали сипаници (морбили) се потврдени во државата, а вирусот е откриен кај тројца македонски државјани од Скопје, Велес и Штип, како и кај едно лице од Косово. Загрижува податокот што меѓу заразените има три бебиња под 12-месечна возраст, додека четвртиот заразен е 40-годишно лице. Сите инфицирани се целосно невакцинирани.
Надлежните институции веднаш презедоа мерки. Во тек се детаљни епидемиолошки анкети за да се утврди дали постои меѓусебна поврзаност меѓу случаите. По овие случувања, заседаваше и Комисијата за заштита од заразни болести, од каде упатија итен апел до родителите за редовна имунизација на децата со цел да се спречи ширење на опасната зараза.
Министерот за здравство, Сашо Клековски, апелираше до граѓаните за максимална претпазливост и одговорност:
„Вакцинирајте се, проверете дали имате две дози од вакцината и дали сте ја прележале болеста. Доколку имате температура и исип не одете на доктор јавете се на доктор. Сипаниците се високо заразни и секое одење во чекална го зголемува ризикот од проширување на сипаниците“, изјави министерот Клековски.
Низек опфат на вакцинација и закана од епидемија
Главниот проблем со кој се соочува здравствениот систем е нискиот опфат на имунизација против мали сипаници, кој со години е под препорачаниот праг за колективен имунитет. Според податоците, минатата година само 62 отсто од децата ја примиле првата доза од МРП-вакцината. Дополнителна загриженост предизвикува состојбата во одредени скопски општини, каде што статистиката покажува дека секое трето дете останало неимунизирано.
Оваа појава доаѓа во момент кога земјите од регионот веќе се соочуваат со епидемии – Косово веќе има регистрирано речиси 150 заразени, додека во Бугарија се пријавени над 500 инфицирани лица. Здравствените власти потсетуваат на сериозноста на ситуацијата, имајќи предвид дека пред седум години земјава се соочи со разорна епидемија на морбили која резултираше со над 2.000 заболени и четири смртни случаи поради компликации.