Премиерот Христијан Мицкоски денеска упати остри критики кон раководството на СДСМ, оценувајќи дека партијата го изгубила својот идентитет и начин на делување. Прашан за коментар на изјавата на лидерот на СДСМ, кој ја нарече ВМРО-ДПМНЕ „бугарофилска партија“, Мицкоски истакна дека таквите тврдења не заслужуваат сериозен коментар.
Тој нагласи дека приоритет на неговата партија остануваат националните интереси.
„Ние сме промакедонска партија и тоа е она што нас нè интересира, а тоа што СДСМ како политичка партија одамна го изгубија својот идентитет и начин на делување, тоа е нивен проблем и мислам дека со тој проблем многу скоро ќе се соочат на избори“, изјави Мицкоски.
Според премиерот, реториката на СДСМ е неконзистентна и често се менува во текот на денот.
„Не можам да го коментирам тоа затоа што утре нешто друго ќе рече. Претпоставувам ќе измисли некоја друга придавка. Практично, човекот секој ден кажува, и раководството на СДСМ генерално, секој ден кажуваат работи кои прво се некултурни, а второ тоа што го соопштуваат во јавноста во текот на денот неколкукратно го менуваат. Така што претпоставувам до вечер ќе бидеме некаква друга „филска“ партија“, додаде тој.