Премиерот Христијан Мицкоски порача дека Владата останува посветена на приоритетите предложени од општините и пратениците, кои веќе се во фаза на реализација.
За време на посетата на Охрид, тој потенцираше дека се работи здружено за Охрид да добие нов лик.
„Би сакал само да споменам дека дел од приоритетите коишто ги имаше општината и дел од проектите коишто ги предложија и пратениците се или реализирани или се во фаза на реализација или ќе отпочнат да се реализираат“, рече Мицкоски.
Тој ги повика граѓаните да го следат прогресот на автопатот и најави дека крајниот рок за негово завршување е првиот квартал од 2027 година.
Посебно внимание во изјавата премиерот посвети на завршувањето на комплексот на Плаошник.
„Следен проект што мислам дека треба многу внимателно да му се посвети внимание овде во Охрид е ‘Плаошник’. Конечно да го завршиме тој проект, почнат од пред многу време“, истакна тој.
Мицкоски ги пофали напорите на локалната администрација и советниците кои ја поддржуваат работата на градоначалникот Пецаков.
Тој заклучи дека Владата останува на сите претходни прогнози за завршување на ветените проекти во предвидените рокови.