Премиерот Христијан Мицкоски изјави дека Владата има мандат од четири години и дека редовните парламентарни избори треба да се одржат во април 2028 година, но порача дека власта е подготвена и за предвремени избори доколку тоа го побара опозицијата.
„Оваа Влада ја добила довербата од граѓаните да го води мандатот четири години. Имаме редовни избори некаде во април 2028 година“, рече Мицкоски.
Тој додаде дека ако опозициските партии поднесат барање во Собранието, владејачкото мнозинство ќе одговори позитивно.
„Имаме здружена опозиција – коалицијата предводена од ДУИ, коалицијата предводена од СДСМ и Левица. Ние сме тука, ќе одговориме позитивно, ќе имаме избори и ќе ги победиме“, изјави Мицкоски.
Премиерот и претходно повеќепати порачуваше дека не гледа потреба од предвремени избори, но дека власта нема да бега од изборно соочување доколку опозицијата формално го побара тоа.