Автопатот Скопје – Блаце конечно влегува во клучната фаза на изведба откако денеска беше потпишан договорот за инвестициски грант со кој и дефинитивно се затвора комплетната финансиска конструкција за негова реализација.
Од свечениот настан беше испратена порака дека разликата меѓу минатото и сегашноста е јасна и видлива, бидејќи државата наместо нови празни зборови има обезбедено средства, избран изведувач и веќе започната реализација на проектот.
- „Денеска отпочнуваме проект кој што беше најавуван со децении. За мене како претседател на Влада претставува задоволство што наскоро на целата територија на државата ќе се развиваат шест автопатски делници“, порача премиерот Христијан Мицкоски.
Тој детално ги наброја сите капитални патни правци чијашто реализација ќе се одвива истовремено во следниот период и кои треба да донесат економски пресврт.
- „Покрај оваа, која што треба да го поврзе главниот град со границата со Косово, односно Блаце, тука се и делниците Тетово-Гостивар, Гостивар-Букојчани. Го завршуваме делот од автопатот Кичево-Охрид, потоа Прилеп-Битола, и наскоро очекувам да биде завршена и процедурата која што треба да ги поврзе Букојчани со Кичево. Заедно со оваа автопатска делница, очекувам овие шест автопатски делници во еден момент да се реализираат. Тоа ќе биде голема додадена вредност за македонската економија, нешто кое што за мене претставува исклучително важно и еден од врвните приоритети на оваа Влада“, додаде Мицкоски.
Премиерот се осврна и на фактот дека овој патен правец долго време беше пример за нереализирани ветувања, нагласувајќи дека новата извршна власт нема намера да бара изговори туку да испорачува резултати.
- „Овој автопат со години беше симбол на неисполнети ветувања, речиси секоја влада го најавуваше. Секоја пред избори ветуваше дека токму таа ќе го изгради. Денеска разликата е јасна и видлива, наместо нови ветувања имаме обезбедени средства, потпишани договори, избран изведувач и започната реализација и очекувам ако биде сѐ како што треба, со Бога напред, овој или другиот месец да почнеме веќе и со теренските активности. Оваа влада нема намера да биде запаметена по изговори. Сакаме да бидеме запаметени по проекти, автопати, експресни патишта, железници, училишта, болници и инвестиции што ќе останат позади нас. Тоа е нашиот одговор на сите оние кои што со години само ветуваа“, дециден беше премиерот.