Македонија останува целосно посветена на членството во Европската Унија, но државата нема да прифати никакви нови отстапки кои задираат во националниот идентитет, порача денеска премиерот Христијан Мицкоски по средбата со хрватскиот колега Андреј Пленковиќ во Охрид.
Двајцата премиери го официјализираа Договорот за стратешка соработка помеѓу владите на Македонија и Хрватска, чин кој Мицкоски го оцени како „повеќе од само дипломатски акт“, заблагодарувајќи се на Загреб за континуираната поддршка.
Премиерот Мицкоски упати сериозни критики кон начинот на кој се води процесот на евроинтеграција, изразувајќи жалење што наместо по заслуги и исполнување на Копенхашките критериуми, тој се претворил во решавање на билатерални спорови.
Во своето обраќање пред медиумите, премиерот беше дециден околу црвените линии на земјава.
„Нема веќе можности за идентитетски отстапки или чекор назад кога станува збор за нашите национални одредници. Колкава и да е цената, оваа Влада е подготвена да ја плати.“
Мицкоски посочи дека наместо чекање на политички отстапки, фокусот во наредниот период ќе биде ставен на домашните реформи, Планот за раст и Реформската агенда. Според него, Македонија е меѓу најодобраните земји од страна на Европската комисија и се очекува најголем дел од средствата од Западен Балкан да завршат во домашниот буџет.
Како одговор на претходните политики, премиерот потенцираше дека сегашната Влада работи на исправање на грешките на претходната власт, за која рече дека го отежнала процесот со прифаќање штетни барања. Тој откри дека Акцискиот план за малцинства е веќе подготвен и се очекува само одобрување од Брисел.
„Ќе чекаме подобри времиња ако билатералните спорови продолжат да му судат на нашиот европски пат. Ние ќе продолжиме силно да работиме на заслуженото место во европското семејство, но не по цена на нашиот идентитет“, заклучи претседателот на Владата.