Претседателот на Владата, Христијан Мицкоски, денеска присуствуваше на увид во градежните активности за уредување на речното корито и канал во општина Кисела Вода. Проектот се реализира со финансиски средства обезбедени директно од централниот буџет преку Министерството за животна среда и просторно планирање.
Премиерот потенцираше дека оваа инвестиција е од витално значење за локалното население бидејќи трајно се решава долгогодишен безбедносен проблем со поплавување на околните домови.
„Би сакал да истакнам дека можеби ова речно корито и овој канал навидум делуваат скромно, но во суштина се од огромно значење за жителите од овој дел на Градот Скопје и Кисела Вода, бидејќи на овој начин се прифаќаат сите оние води коишто во услови кога можат да надојдат тие прават многу големи проблеми на домовите на жителите на ова населено место и тоа се случувало во минатото. Затоа со овој проект ние практично го решаваме тој проблем за да повеќе не ни се случува.“
Мицкоски упати честитки до општинската администрација, градоначалничката и советниците за успешното менаџирање на активностите на терен.
Тој најави дека соработката меѓу извршната власт и локалните самоуправи продолжува со засилено темпо преку реализација на голем број проекти низ целата држава.
„Најголемиот дел од тие проекти се во фаза на реализација, дел се веќе завршени, дел ќе отпочнуваат така што она коешто го започнавме кога бевме избрани како Влада еве продолжуваме да го реализираме и ценам дека на овој начин драматично го подобруваме квалитетот на живот на граѓаните.“
Според најавите, тековниот проект изнесува близу 60 милиони денари, додека веќе за следната недела е планиран почеток на нов инфраструктурен зафат со вредност од дополнителни 40 милиони денари.