Премиерот Христијан Мицкоски, во ново интервју за Атлантскиот совет, истакна дека во мултилатералниот свет не смее да се бега од дијалогот дури и за најтешките прашања, порачувајќи дека вистинските патриоти не се предаваат. Во фокусот на разговорите беа и стратешките енергетски проекти, евроинтеграциите и соработката со САД.
Осврнувајќи се на односите со соседите и европскиот пат, премиерот потврди дека владата останува посветена на дијалогот и на стратешкото партнерство со САД.
„Ние не сме сами во светот. Во овој мултилатерален свет и демократско општество треба да разговараме, да комуницираме. Дури и ако комуницираме за тешки прашања, едноставно не можеме да се повлечеме од разговорите, бидејќи тогаш ќе испратиме многу погрешна порака и ќе се изолираме. Вистинските патриоти водат битки и победуваат во битки, не се предаваат и не се повлекуваат од битките. Ова е менталитетот и карактерот на оваа Влада: да ги води битките и да победи во битките. Јас никогаш немадa се предадам и никогаш нема да се повлечам од каков било разговор. Сосема спротивно – ќе продолжиме да разговараме и на крајот ќе победиме“, истакна Мицкоски.
Тој нагласи дека земјата се потпира на три столба – инфраструктура, енергетика и вештачка интелигенција, најавувајќи дека интерконекторот со Грција за ЛНГ терминалите во Александрополис ќе биде готов во првата половина од следната година, со цел до крајот на 2028 година земјата да прерасне во значајна транзитна гасна маршрута кон Централна Европа. Мицкоски додаде дека паралелно се работи и на нов примарен дата-центар за подобрување на сајбер-безбедноста преку реформската агенда и европска поддршка.