Премиерот Христијан Мицкоски денеска ја отвори конститутивната седница на Националниот совет за финансиски истраги и конфискација на имот, порачувајќи дека борбата против криминалот влегува во нова, одлучувачка фаза. Според него, фокусот веќе не е само на кривичните пријави, туку на конфискацијата на нелегално стекнатиот имот.
„Борбата мора да заврши со конфискација, бидејќи криминалот не смее да се исплати. Украденото мора да му се врати на народот“, истакна Мицкоски. Тој откри дека во моментов институциите работат на повеќе од педесет случаи за висока корупција кои со години биле „прикривани или игнорирани“.
Премиерот нагласи дека овој Совет не е само формалност, туку механизам за системска борба каде нема недопирливи. Според Стратегијата за 2025-2028 година, главните цели се пронаоѓање на имот во земјата и странство, негово брзо замрзнување и на крајот, користење на конфискуваниот имот за социјални и општествено корисни цели.