Премиерот Христијан Мицкоски денеска ја отвори Втората регионална министерска конференција за демографска отпорност во Скопје, на која учествуваат високи претставници на ОН, Советот на Европа и меѓународни организации. Во своето обраќање, тој ја најави новата Стратегија за демографска отпорност 2026–2046, која треба да послужи како долгорочен план за опстанокот и развојот на земјата.
Според премиерот, демографските промени веќе не се само статистички податок, туку реалност која се чувствува преку испразнетите училници и недостигот на работна сила.
„Нашата определба е јасна — наместо политика на страв, градиме политика на отпорност. Наместо краткорочни мерки, создаваме долгорочна стратегија. Наместо декларативни заложби, поставуваме системски решенија. Токму затоа ја подготвивме новата Стратегија за демографска отпорност 2026–2046. Не како формален документ што ќе остане на хартија, туку како национална рамка за иднината на државата“, истакна Мицкоски.
Стратегијата предвидува сеопфатен пристап кој ги поврзува економијата, здравството, образованието и социјалните политики. Премиерот потенцираше дека најголемата сила на државата се луѓето, а не ресурсите.
Во својот говор, тој упати и порака за личната одговорност на секој граѓанин кон системот.
„Конечно треба сите ние да си го поставиме прашањето дека што можеме ние да направиме за татковината, а не татковината за нас. Не можеме ние континуирано да го трошиме системот, не можеме континуирано да го злоупотребуваме системот и да бараме тој ист систем да ни враќа со најдобри политики, со најдобри услуги. Мораме да сме свесни дека системот сме ние, и каков систем ќе изградиме, така тој систем нас ќе ни врати“, порача тој.