Премиерот Христијан Мицкоски денеска од Охрид негираше дека средствата од ИПАРД програмата се блокирани по апсењата во Агенцијата за поддршка на земјоделството. Напротив, тој истакна дека акцијата за борба против корупцијата е „поздравена“ од Европската комисија.
Мицкоски потврди дека тој побарал да се блокира исплатата на парите од ИПАРД, но со цел да се продлабочи истрагата и да се утврди обемот на злоупотребите.
„Мораме да видиме до каде одат злоупотребите. Затоа што првичните информации говорат дека тоа не е од сега туку години наназад тоа е правено, така што се ќе истражиме и секој кој што мисли дека така ќе помине се лаже. Има да одговараат сите од прв до последен. Кој сака нека биде“, рече Мицкоски.