Премиерот Христијан Мицкоски во телевизиско интервју за „Заспиј ако можеш“ најави дека ќе иницира регионална иницијатива за здружување на инвестиции во енергетиката, со потенцијал од неколку милијарди евра.
Во емисијата, тој објасни дека иницијативата има за цел Западниот Балкан заеднички да настапува при привлекување идни енергетски инвестиции, посочувајќи на своето учество на Светскиот економски форум во Давос, каде дискутираше со Фатих Бирол од Светската енергетска агенција, американскиот секретар за енергетика и претставници на АЕС и АРАМКО.
- „Бирол посочи дека потребите за електрична енергија во светот следната деценија ќе растат два и пол пати побргу од вкупните потреби за енергија. Следната деценија ќе недостигаат речиси 40.000 теравати инсталиран капацитет – толку колку моментално имаат САД, Канада, ЕУ и Јапонија заедно“, објасни премиерот.
Мицкоски додаде дека ако регионот заедно се појави на пазарот на идните инвестиции, дури и само 0,1% од потребниот капацитет би значело 4 теравати, што би изнесувало 4 трилиони долари, или 400 милијарди долари годишно.
- „Разговарав со колегите и сакам ова да се дискутира на следниот состанок ЕУ – Западен Балкан во Подгорица и да произлезе регионална иницијатива. Предлогот на министерот Муцунски е да ја именуваме SECI (Skopje Electricity Connectivity Initiative), да го направиме првиот состанок тука и да го претставиме регионалниот „пул“ на проекти пред странски инвеститори“, заклучи Мицкоски.