Одредени маркети забележале зголемување на бруто маржата од 2 до 5 отсто во споредба со минатата година, поради што ќе бидат повикани на состанок каде јасно ќе им биде кажано дека тоа е недозволиво. Ова денеска го истакна претседателот на Владата, Христијан Мицкоски, одговарајќи на новинарско прашање за текот на преговорите со маркетите и намалувањето на цените на храната.
Премиерот потенцираше дека ваквото однесување нема да се толерира и најави дека параметрите од Државниот пазарен инспекторат ќе бидат јавно објавени за една недела.
Според него, доколку се скратат овие дополнителни проценти кај трговците, земјава би имала најниска инфлација на европскиот континент.
Во однос на тековните чекори на извршната власт, Мицкоски појасни дека во тек е и подетална и посложена анализа која опфаќа сериозен број на прехранбени артикли.
Зад овие најави стои неговата дословна изјава во врска со маржите и инфлацијата:
„Да, да бидам конкретен со пример – ако минатата година во јуни месец бруто маржата била 10 отсто, сега е 12 или 15 проценти. Тоа се тие дополнителни 2 до 5 проценти и тоа ние нема да го толерираме и многу јасна порака ќе испратиме кон тие. Кога би се намалиле тие 2 до 5 отсто, тогаш практично, ние би биле земја со најниска инфлација во Европа, во овој момент, иако очекувам стабилизирање на инфлацијата во јуни месец, мнопла вредност во споредба со мај и со април“
Во однос на дополнителните мерки кои се подготвуваат, премиерот го додаде следново:
„Исто така, ја дефинираме онаа група од 600-700 производи, каде што правиме анализа, таму ќе ни треба малку повеќе време, бидејќи се влезни-излезни фактори, маржа која што ја имаат дистрибутерите и производителите, визави бруто маржа, која што ја имаат ланците маркети. Малку е посложена анализата, лично јас ја работам, така што можеби ќе ни треба малку повеќе време“