Нашата визија е изградба на држава во која успехот нема да зависи од привилегии, туку од знаење, во која институциите ќе бидат вистински сервис на стопанството, а економијата ќе се темели на иновации, квалитет и конкурентност, порача премиерот Христијан Мицкоски на форумот за одржливост и отпорни бизниси.
Тој истакна дека целта е држава која ќе биде доволно силна да се справи со кризи, но и доволно подготвена да ги искористи можностите што тие ги носат, додавајќи дека Владата останува посветена на поддршка на стопанството.
Мицкоски нагласи дека одржливоста денес не претставува административна обврска, туку развојна шанса, поради што Владата ќе продолжи со мерки за поддршка на зелената и дигиталната трансформација, подобар пристап до финансии и намалување на административните бариери.
„Ќе работиме на модерна инфраструктура, поврзување со европските пазари и создавање кадар подготвен за потребите на современата индустрија“, истакна премиерот.
Тој посочи дека економскиот фокус не е само на растот, туку на неговиот квалитет, кој треба да се темели на инвестиции, иновации и дигитализација.
Според него, во последниот период се бележи раст на платите и подобрување на животниот стандард, при што реалните примања по повеќегодишен пад повторно се во пораст.
Мицкоски нагласи дека Владата води одговорна фискална политика, при што во изминатиот период биле сервисирани милијарди евра јавен долг, што, како што рече, испраќа сигнал за стабилност и кредибилитет кон инвеститорите и меѓународните институции.
На настанот присуствуваа министри, амбасадори, странски претставници и претставници на бизнис-заедницата.