Премиерот Христијан Мицкоски денеска категорично ги отфрли обвинувањата од опозициската СДСМ во врска со наводните сомнителни унгарски инвестиции во телекомуникациите, енергетиката и медиумите. Тој ја обвини опозицијата дека креира лажна реалност, споредувајќи ги нивните тврдења со приказната „Алиса во земјата на чудата“.
„СДСМ изминатиов период живее во земјата на лагите и конструкциите. Лани велеа дека државата ќе банкротира, а ние завршивме со еден од најдобрите пет економски резултати во Европа според растот на БДП. Лажеа дека во април ќе дојдат мигранти – еве сме на средина на април, јас мигрант не видов. Велеа дека сме пред банкрот, а пензионерите и вработените во администрацијата добија повисоки примања“, истакна Мицкоски.
Одговарајќи на конкретните прозивки за влезот на унгарски капитал во телекомуникациите, премиерот појасни дека станува збор за целосно транспарентна постапка водена од Агенцијата за електронски комуникации (АЕК). Тој потврди дека компанијата „4иГ“ веќе уплатила 9 милиони евра за лиценцата за трет мобилен оператор.
„Компанијата ’4иГ‘, која патем е партнер со германската ’Раинметал‘ и со ’Спејс Икс‘ (SpaceX) на Илон Маск, се стекна со правото да биде трет мобилен оператор. Вистинското прашање е зошто во времето на СДСМ и ДУИ немаше трет оператор и зошто македонските граѓани плаќаа најскапи мобилни услуги?“, запраша премиерот.
Во однос на најавите за ревизија на други унгарски инвестиции во енергетиката и медиумите, Мицкоски рече дека не е запознаен со такви вложувања, но додаде дека секој странски капитал е добредојден доколку ги почитува Уставот и законите на државата.