Македонија влегува во период на нестабилно време кој ќе трае до средината на работната недела. Според метеоролозите, до среда се очекуваат чести врнежи од дожд, проследени со грмежи и локална појава на невреме.
Времето денеска ќе биде сончево со умерена облачност, но во попладневните часови облачноста ќе се зголеми, што ќе донесе дожд, особено во северните и западните делови од земјата.
„До среда ќе се задржи променливо облачно и нестабилно време, на повеќе места со пороен дожд и грмежи. Локално ќе има појава на невреме со поинтензивен пороен дожд, грмежи, засилен ветер и изолирана појава на град“, соопштуваат од Управата за хидрометеоролошки работи (УХМР).
Дневните температури ќе бидат во благ пад, но ќе останат во рамките на просекот за овој период од годината. Во главниот град Скопје се очекува слично време, со услови за пороен дожд и грмежи во попладневните часови.
Стабилизација на временските прилики и значително повеќе сонце се најавува дури од четврток, кога температурите повторно ќе бидат во пораст.