Италијанската премиерка Џорџа Мелони денеска изјави дека односите со Соединетите Американски Држави треба да се вратат во нормала, по минатонеделната јавна расправија со американскиот претседател Доналд Трамп.
„Немам намера дополнително да ја разгорувам оваа расправија“, изјави Мелони во интервју.
Како започна спорот?
Тензиите ескалираа во петокот, кога Мелони го обвини својот некогашен близок сојузник Трамп дека измислил приказна за неа. Ова уследи откако американскиот претседател за италијанска телевизија изјави дека таа го „молела“ да се фотографира со неа за време на неодамнешниот самит на Г-7 во Франција.
Мелони тогаш експресно возврати со пораката дека „ниту таа, ниту Италија никогаш не молат“.
Соработката останува стабилна
И покрај острите зборови, италијанската премиерка нагласи дека билатералната соработка меѓу Италија и САД мора да продолжи да функционира во нормални рамки.
„Тоа го кажав и вчера на седницата на Владата, имајќи ги предвид претстојните средби“, рече таа.
Мелони оцени дека не постои ризик од негативни последици врз стратешките односи меѓу двете земји и дека врските остануваат силни.
„Тие нема повторно да бидат преиспитувани поради една расправа на социјалните мрежи“, децидна е италијанската премиерка.
Дипломатски последици: Тајани го откажа патувањето за САД
Иако Мелони се обидува да ги смири тензиите, спорот меѓу Трамп и италијанскиот државен врв претходно дополнително се заостри на дипломатски план. Шефот на италијанската дипломатија, Антонио Тајани, соопшти дека поради навредливите изјави на американскиот претседател, во знак на протест го откажува своето планирано патување во САД.