Мечка по четврти пат ја ограби слаткарницата Глејдс Хоуммејд Кендис (Glades Homemade Candies) во туристичкиот град Гатлинберг (Тенеси), јавува локалната телевизија Вејт (WATE). Според снимката од надзорната камера, животното ја скршило стаклената врата, ги превртело полиците и извадило надвор садови со благи работи.
Сопствениците велат дека веќе 35 години произведуваат благи производи, но ваквите упади се сериозен проблем. Тие додаваат дека преземале секакви мерки за заштита, вклучувајќи безбедносни брави, контејнери отпорни на мечки и дополнителни безбедносни системи, но тоа не ја спречило мечката да си „касне“ по четврти пат од „слатките“ задоволства.
Случајот е пријавен во Агенцијата за ресурси и диви животни на Тенеси (TВРА), која потврди дека спроведува истрага. Газдите се надеваат дека мечката ќе биде преместена, додавајќи дека го почитуваат локалното диво животинско царство и Националниот парк Големи димни планини.