Украина во текот на ноќта извршила масовен напад со повеќе од 600 беспилотни летала насочени кон Москва, соопшти денеска градоначалникот на руската престолнина, Сергеј Собјанин, преку Телеграм, пренесе ДПА.
Според Собјанин, руската противвоздушна одбрана уништила 201 украински дрон во Московската област, додека поголемиот дел од беспилотните летала биле пресретнати пред да стигнат до регионот.
Градоначалникот на Москва соопшти дека во текот на нападите биле повредени три лица. Тој не даде дополнителни информации за евентуална материјална штета.
Во меѓувреме, украинскиот весник на англиски јазик „Киев Индипендент“ објави дека украинските вооружени сили извршиле напади врз магацин во сопственост на рускиот гигант за онлајн трговија „Вајлдберис“, како и врз индустриски објекти во руски градови во поширокиот регион.