Министерството за економија и труд денеска ќе одржи состанок со производителите и дистрибутерите, на кој ќе се разговара за набавните и продажните цени на основните производи.
Министерот за економија и труд Бесар Дурмиши, по седницата на Економско-социјалниот совет во четвртокот, информираше дека контролите на Државниот пазарен инспекторат, спроведени кај повеќе од 700 производи, покажале дека во периодот од мај 2025 до мај 2026 година просечните набавни цени на основните прехранбени производи и средствата за хигиена се зголемиле за 2,66 проценти, додека просечните продажни цени пораснале за 4,56 проценти.
Според Дурмиши, овие податоци укажуваат дека дел од растот на малопродажните цени произлегува од зголемените бруто-профитни маржи кај дел од трговците.
„Кога набавните цени се намалиле, дел од трговците не ги намалиле и продажните цени, туку ги задржале или зголемиле своите маржи“, изјави министерот.
Тој посочи и дека инфлацијата во јуни е намалена за 0,5 проценти. Цените на храната и безалкохолните пијалаци се намалиле за 1,1 процент, а на транспортот за 1,6 проценти.
Дополнително, најновата анализа за периодот од март до јуни 2026 година покажува поинаков тренд. Во тој период набавните цени се зголемиле за околу 2,04 проценти, додека продажните цени пораснале за само 0,16 проценти.
Според Дурмиши, тоа укажува дека во последните месеци е забавен растот на бруто-профитните маржи и дека цените влегуваат во постабилна фаза. Тој нагласи дека најголемото зголемување на маржите е забележано во текот на изминатата година, додека во периодот од март до јуни годинава нивниот раст изнесува само 0,16 проценти.