Денеска попладне и градот Виница ќе се приклучи кон масовниот протестен собир „Марш на ангелите“, посветен на жртвите кои го загубија животот во катастрофалниот пожар во дивата дискотека „Пулс“ во Кочани. Трагедијата однесе вкупно 63 претежно млади животи, додека над 200 лица претрпеа тешки и полесни повреди.
Според официјалните информации од здружението на граѓани „16 март 2025“, почетокот на собирот е закажан за 16 часот и 45 минути на градскиот плоштад „Ангел Винички“. Организаторите упатија јавен повик до сите граѓани и поддржувачи масовно да се приклучат на маршот, чие тргнување е предвидено точно во 17 часот и 5 минути. Главната цел на овој марш е да се испрати силен повик за вистинска правда, но и предупредување дека ваква институционална и безбедносна катастрофа никогаш повеќе не смее да се повтори.
„Маршираме затоа што зад бројката 63 стојат 63 прекинати животи, неостварени соништа, празни соби и семејства што засекогаш останаа без дел од себе. Затоа што над 500 повредени и преживеани не се бројки во извештај туку луѓе што секој ден живеат со физички последици и трауми од таа ноќ. Маршираме затоа што за ваква трагедија не смее да постои симболична одговорност. Затоа што условна казна не е правда за 63 изгубени животи и стотици уништени семејства. Молчевме доволно. Сега зборуваат ангелите преку нас. Чекорат преку нас. Во сабота и Виница ќе чекори со нас“, стои во емотивната објава на организаторите.