Годинава за здравствениот сектор се обезбедени рекордни повеќе од една милијарда евра, што претставува најголема финансиска поддршка досега, соопшти денеска на прес-конференција пратеникот на ВМРО-ДПМНЕ, Петар Марков.
Тој посочи дека овие средства се насочени кон инвестиции во човечки ресурси, здравствени услуги, инфраструктура и опрема, со посебен фокус на младите лекари.
Со одлуката за вработување на уште 300 приватни специјализанти до крајот на 2026 година се прави значаен чекор кон решавање на долгогодишниот недостиг од специјалистички кадар во јавните здравствени установи. Ова значи сигурна професионална перспектива за младите лекари, повеќе специјалисти во болниците и клиниките и поквалитетна здравствена заштита за граѓаните низ целата држава, затоа што вложувањето во младите лекари е вложување во иднината на македонското здравство – изјави Марков.
Во однос на примарната здравствена заштита, тој потсети на зголемувањето на капитацискиот бод за матичните лекари по општа медицина и гинекологија од 75 на 100 денари, како и за матичните стоматолози од 61 на 75 денари.
Ова претставува директна инвестиција во примарната здравствена заштита и во матичните лекари, кои се првата и најважна алка во здравствениот систем. Со ова се создаваат подобри услови за работа, а воедно се поттикнува отворање и на нови ординации – истакна тој.
Пратеникот ги истакна и чекорите за проширување на позитивната листа на лекови со нови терапии на товар на ФЗО, меѓу кои девет генерички лекови за кардиоваскуларни заболувања, депресија и деменција, како и антикоагулантните лекови Еноксапарин, Надропарин и Ривароксабан.
ВМРО-ДПМНЕ покажа дека здравството се унапредува со конкретни политики, инвестиции и мерки. Инвестираме во младите лекари, го јакнеме примарното здравство, обезбедуваме поголема достапност на современи лекови и вложуваме рекордни средства во здравствениот систем – нагласи Марков.