Опозициските партии СДСМ и Левица здружено го блокираат донесувањето на Изборниот законик поради страв од ниските рејтинзи, обвини денеска портпаролот на ВМРО-ДПМНЕ, Валентин Манасиевски. Според него, со ваквиот чекор директно се загрозува исполнувањето на обврските од европската Реформска агенда.
Манасиевски појасни дека Изборниот законик со месеци се договарал и дека владејачката партија ги прифатила сите предлози на опозицијата, освен барањето за гласање на дијаспората.
„Единствено нешто што побаравме е по електронски пат нашата дијаспората да може да гласа уште на следните претседателски избори. Прво го прифатија ова наше барање, а денес истите го блокираат. Јавноста мора да знае, дека овој Закон е дел од Реформската агенда, и тој се носи со сугестии и забелешки од страна на ОБСЕ и ОДИХР“, изјави Манасиевски.
Од владејачката партија упатија јавен повик до опозицијата за повлекување на спорните амандмани со цел законот да се донесе со консензус.
„Упатуваме јасна порака до СДС и до Левица, да предложат амандмани со кои бараат корекција на начинот на заокружување и на поднесување на приговори и да ги повлечат другите амандмани и заедно, консезуално да го донесеме овој Изборен законик. Нашата дијаспора има право да учествува по електронски пат на следните претседателски избори, во време кога вештачката интелигенција има клучна улога“, додаде портпаролот на ВМРО-ДПМНЕ.
Тој потенцираше дека лидерите на СДСМ и Левица, Венко Филипче и Димитар Апасиев, преку оваа блокада се обидуваат да го сопрат повлекувањето на финансиски средства за државата.
„Венко Филипче и Димитар Апасиев, со блокада на овој Закон, сакаат директно да и нанесат штета на Македонија во делот на исполнување на реформите од Реформската агенда, но и во повлекувањето на средства од Планот за раст. На СДС и на Левица им пречи тоа што ВМРО-ДПМНЕ работи чесно, одговорно и транспарентно. Им пречи што сме први во регионот во исполнување на реформи од Реформската агенда и во повлекување на финансиски средства од Планот за раст. Ние ќе продолжиме по тој пат, бидејќи тој пат е вистинскиот за Македонија“, заклучи Манасиевски.