Валентин Манасиевски, член на ЦК на ВМРО-ДПМНЕ, денеска упати жестоки обвинувања до претседателот на ССМ, Слободан Трендафилов, тврдејќи дека тој работи за интересите на СДС, а не на работниците. Според Манасиевски, Синдикатот свесно го одбива владиниот план за зголемување на административните плати од вкупно 40%.
„Избраникот на СДС, кој беше наместен преку Јованка Тренчевска, продолжува да работи за својата партија. Трендафилов бара нагло зголемување на минималецот од 50% за само една година, а за цели 7 години власт на СДС, минималната плата вкупно не порасна толку“, истакна Манасиевски.
Тој појасни дека планот на ВМРО-ДПМНЕ е одржлив и предвидува раст на платите од 14% уште во април годинава, што до 2028 година би значело вкупно зголемување од 40%, односно за над 10.000 денари повисоки примања во администрацијата. Манасиевски го повика ССМ да ја остави политиката и да го прифати предлогот на Владата за да не се предизвика економска криза и инфлација.