Портпаролот на ВМРО-ДПМНЕ, Валентин Манасиевски, на денешната прес-конференција упати сериозни обвинувања до СДСМ и нивниот лидер Венко Филипче, тврдејќи дека партијата е подготвена за ново историско предавство на македонските национални интереси.
Според Манасиевски, СДСМ низ историјата веќе направиле предавства со менување на името, знамето и Уставот, а сега на чело со Филипче биле подготвени за најстрашниот чекор за македонскиот народ – редефинирање на историјата и негирање на јазикот и идентитетот. Тој додаде дека тие се спремни да го променат сето она што се пренесувало од колено на колено и утре би потпишале дека постоиме дури од 1945 година.
Од владејачката партија потенцираат дека во моменти кога Европската Унија конечно ја гледа Македонија како достоинствена држава со напредна економија која е пример за реформи во регионот, Румен Радев, Венко Филипче и СДСМ заеднички повикуваат на уставни измени.
Манасиевски јавно запраша со што е уценет лидерот на опозицијата за да води таква политика и, наместо да застане во одбрана на македонските интереси, тој свесно ги распродава.
На крајот од своето обраќање, портпаролот на ВМРО-ДПМНЕ порача дека токму поради ваквите чекори и одењето по стапките на Зоран Заев, СДСМ и Филипче денес се наоѓаат во опозиција со рејтинг кој е рамномерен на една шака луѓе, поради што ги очекува целосно декласирање на следните избори.