Портпаролот на ВМРО-ДПМНЕ, Валентин Манасиевски, на денешната прес-конференција го обвини раководството на СДСМ и неговиот претседател Венко Филипче за намерно предизвикување инциденти, ширење паника и манипулации во јавноста.
Според Манасиевски, последниот таков случај се случил во Ново Село, каде што, како што тврди тој, биле испратени лица со криминални досиеја за да предизвикаат инцидент.
„Почитувани, Кога станува збор за СДС и актуелното раководство, другарите на Венко Филипче секојдневно сведочиме на лаги, манипулации, ширење на паника, како и наменско креирање на инциденти за да привлечат внимание. Во нивни стил за доаѓање на власт, во Ново Село пуштија лица кои се насилници, корисници на наркотични средства да направат инцидент. Тоа беа лица со криминални досиеја роднини на другарот на Филипче, Зоран Заев“, изјави Манасиевски.
Портпаролот на владејачката партија додаде дека сите намери на СДСМ веднаш биле демаскирани пред јавноста.
„Секако, и оваа приказна на Филипче имаше краток рок и веднаш беа разоткриени и лицата и нивните намери. Тие дури и сами почнаа да признаваат дека биле дел од инцидентот во Ново Село. На сите им е јасно дека вакви лица како Филипче и актуелното раководство на СДС не можат да направат нешто сериозно, а не да дојдат власт и да водат држава. Секој ден со секој нов случај само покажуваат дека се талог во Македонија. Оттука никој во државава сега и не очекува ништо од нив“, порача Манасиевски.