Поранешниот министер за внатрешни работи Оливер Спасовски не го одзел овластувањето на станицата за технички преглед во Сарај навреме, туку реагирал дури три дена по трагичната несреќа на автобусот на „Беса Транс“ во која загинаа 45 лица, обвини денеска Валентин Манасиевски, член на ЦК на ВМРО-ДПМНЕ.
Манасиевски истакна дека автобусот кој изгоре во Бугарија поминал технички преглед токму во оваа фирма, за која веќе имало изготвен извештај за неправилности.
„Оливер Спасовски не постапил кога бил должен да постапи… Уште потрагично е тоа што, Оливер Спасовски реагирал дури три дена по трагедијата во Бугарија во која загинаа наши 45 сограѓани, со автобусот кој поминал технички преглед во истата оваа фирма во Сарај. Дали доколку Оливер Спасовски реагирал навремено ќе била спречена оваа трагедија?“, праша Манасиевски.
Од ВМРО-ДПМНЕ прашуваат дали Спасовски во паника го одзел овластувањето по несреќата поради грижа на совеста и бараат одговорност за, како што велат, системските грешки.