На денешната прес-конференција, претставникот на ВМРО-ДПМНЕ, Манасиевски, упати сериозни обвинувања до лидерот на опозициската СДСМ, Венко Филипче. Според Манасиевски, опозицијата води погубна национална политика, покажувајќи подготвеност за правење отстапки на штета на македонските државни интереси со цел политичко додворување кон официјална Софија.
Од владејачката партија го обвинија Филипче за континуирано премолчување на негирањата кои пристигнуваат од бугарските власти.
„Не постои барање од Бугарија кое уценетиот Филипче нема да го исполни за да дојде на власт. Додека бугарските власти не нарекуваат „северномакедонци”, Филипче вели дека Бугарија не го негира нашиот идентитет. Филипче не гледа проблем во тоа да не нарекуваат „северномакедонци” затоа и гласаше за промена на името. Филипче не гледа проблем во тоа да сме држава од 1945 година па наваму, затоа и ги бришеше одлуките на АСНОМ во уставот со Зоран Заев. Филипче не гледа проблем во тоа великанот Гоце Делчев да е Бугарин, исто како што немаа проблем со тоа и Стево Пендаровски, Рубин Земон и луѓето во околината на Филипче.“
Покрај критиките за надворешната политика, Манасиевски се осврна и на актуелната состојба во СДСМ, потенцирајќи дека ваквиот партиски курс резултира со историски најнизок рејтинг кај граѓаните.
„Пиунот на Румен Радев, Венко Филипче е спремен утре да ги продаде историјата, јазикот, културата и идентитетот за да и се додвори на Бугарија и да дојде на власт. Погубната политика која ја води уценетиот Филипче, го доведе да има рејтинг од 3%, односно помал за 1% од оној на партијата СДС. Филипче ја зацементира СДС да биде четврта партија во Македонија, а на следните избори може да бидат и со едноцифрен број на пратеници во Собранието.“