Валентин Манасиевски, член на Централниот комитет на ВМРО-ДПМНЕ, на денешна прес-конференција обвини дека пратеничката од Левица, Јована Мојсоска, можеби извршувала незаконска дејност ако навистина работела како сметководител на својата партија додека била активен пратеник.
Обраќајќи се пред медиумите, Манасиевски изјави дека Левица вчера индиректно ги потврдила информациите изнесени од, како што рече, свиркачи од внатрешноста на партијата, дека раководството подигало средства од партиската сметка за лични или нецелосно објаснети намени.
„Вчера, од Левица на прес-конференција се излетаа и признаа дека информациите кои ги добивме се вистинити. А денес ја прашуваме Мојсоска, која самата изјави дека била сметководител на Левица – дали знае дека тоа е спротивно на законот?“, запраша Манасиевски.
Тој се повика на повеќе одредби од Законот за пратеници, потенцирајќи дека функцијата пратеник е неспојлива со вршење на дејности со профитна цел, вклучувајќи и сметководствени услуги.
„Функцијата пратеник се врши професионално, без право на вршење други професии или јавни функции што се во судир со законот. Ако Мојсоска навистина вршела сметководствени услуги – тоа е прекршување“, нагласи Манасиевски.
Дополнително, од ВМРО-ДПМНЕ ја обвинија Левица дека „зад параванот на чесност и скромност“ стојат нетранспарентни финансиски активности, кои, според нив, се финансирани директно од Буџетот на граѓаните.
„Ова е вистината од која Левица бега. Мојсоска и Левица се прочитани. Вакви луѓе немаат место во иднината на македонската политика“, заклучи Манасиевски.