Членот на Централниот комитет на ВМРО-ДПМНЕ, Валентин Манасиевски, на денешната прес-конференција упати остри критики до СДСМ и нивниот лидер Венко Филипче. Според него, опозициската партија е подготвена да ги редефинира македонската историја и идентитет само за да се докопа до власт.
Манасиевски предупредува дека СДС и Филипче се подготвени веднаш да направат „ново национално предавство“ преку прифаќање на уставните измени, иако бугарските власти јасно ставиле до знаење дека тоа не е последниот услов за влез во ЕУ.
„Бугарските власти, јасно кажаа дека уставните измени не се последниот услов кој го имаат за влез на Македонија во ЕУ. Од една страна, СДС и Филипче велат дека Бугарија не го негирала македонскиот идентитет, а од друга страна, бугарските власти секојдневно велат дека македонската нација постои од 1945 година, дека македонскиот јазик има бугарски корени и дека ние сме еден народ во две држави“, истакна Манасиевски.
Од ВМРО-ДПМНЕ додаваат дека Венко Филипче ги следи ставовите на неговиот ментор Зоран Заев и ги повикаа социјалдемократите да престанат да и нанесуваат штета на државата.
„За СДС и Венко Филипче, не се важни македонските национални интереси и македонскиот идентитет, ниту пак им се важни граѓаните. За нив важно е само како да се дофатат за власта за да можат што повеќе да крадат“, заклучи Манасиевски.