Владејачката партија ВМРО-ДПМНЕ денеска упати сериозни обвинувања до претседателот на опозициската СДСМ, Венко Филипче, тврдејќи дека неговите политички ставови се директно усогласени со бугарските официјални позиции. Портпаролот на партијата, Валентин Манасиевски, на прес-конференција изјави дека опозицијата е подготвена да направи отстапки кои директно ги загрозуваат националните интереси.
Според ВМРО-ДПМНЕ, чекорите кои ги предлага СДСМ во однос на евроинтеграциите одат на штета на македонскиот идентитет.
„Прво спроведување на уставни измени, а потоа редефинирање на историјата и идентитетот. До таму е спремен да оди специјалниот бугарски пратеник на Румен Радев, Венко Филипче“, изјави Манасиевски.
Портпаролот на партијата направи паралела меѓу изјавите на лидерот на опозицијата и претставници на одредени бугарски фондации и официјални лица во Софија, нагласувајќи дека тие имаат ист наратив кон македонската држава.
„Филипче е на иста линија со Виктор Стојанов од фондацијата “Македонија”, која дејствува во Македонија ширејќи говор на омраза кон Македонците, негирање на македонскиот идентитет и претставување на македонската историја како бугарска. Филипче е на иста линија и со бугарската министерка на Радев, Петрова Чамова. Како што можеме да видиме на фотографиите зад мене и двајцата велат дека преговараме со ЕУ, а не со Бугарија. Но, проблемот е во тоа што само Бугарија поради свои интереси ја кочи и ветоизира Македонија на полето на евроинтегративниот процес“, подвлече Манасиевски.
Манасиевски истакна дека бугарските власти наоѓаат соработници во македонската политика, и покрај тоа што граѓаните веќе јасно ја изразиле својата волја и незадоволство на изборите.
„За таа цел, бугарските власти ги најдоа меките ткива во политиката во Македонија, како Зоран Заев, Димитар Ковачевски Ковачевски а сега и Венко Филипче, кои слугуваат на туѓи интереси на штета на сопствените – македонските. Иако граѓаните им одржаа лекција, ги казнија на 4 последователни избори, токму поради нивните антидржавни политики, на Филипче и на СДС не им доаѓа памет и продолжуваат со истата поданичка политика мислејќи дека така ќе дојдат на власт“, додаде тој.
На крајот од своето обраќање, Манасиевски ја пренесе официјалната позиција на партијата на власт во однос на историските прашања и заштитата на државното достоинство.
„ВМРО-ДПМНЕ нема да дозволи бугаризација на историските ликови кои твореле, кои го описмениле регионот и кои се бореле за да создадат македонска држава. Македонија има своја историја, свој идентитет и свој македонски јазик. Се додека ВМРО-ДПМНЕ е на власт, нема да дозволиме погазување на нашето достоинство“, заклучи портпаролот на ВМРО-ДПМНЕ.