Четиригодишно момче по име Тео почина откако беше нападнато и убиено од овчарско куче во романското село Лимпезис, округот Бузеу. Трагедијата се случила недалеку од семејниот дом, во момент кога детето излегло од дворот без знаење на неговата мајка.
Според информациите од локалното население, момчето отишло во блиското трло каде што кучето било врзано. Животното го нападнало детето и го убило на лице место, а телото без знаци на живот го пронашле сопствениците на имотот додека мајката во паника го барала.
„Кога сопственичката на кучето го пронашла детето, таа не се чувствувала добро“, рекол еден сосед. Друг жител појасни дека мајката веднаш почнала да го повикува Тео штом забележала дека го нема од дворот.
„Таа извика: „Тео, Тео!“ Рече дека си играл покрај колата. Кога излегла надвор, повеќе не можела да го најде“, рече соседката.
Потресно сведоштво за медиумите даде и дедото на починатото момче. „Го извадија оттаму, кучето го касна целото тело. Имаше само четири години“, рече неутешниот дедо.
Мештаните раскажуваат дека детето често сакало да му се приближува на кучето, веројатно за да го нахрани. „Кучето сигурно го привлекувало, сакал да оди таму“, рече еден од соседите, кои додаваат дека иако животното било врзано, дворот каде што се наоѓало не бил соодветно ограден.
Обвинителството во Бузау веќе отвори официјална истрага за убиство од небрежност, а под лупа на истражителите се сопственикот на кучето и мајката на момчето. Првиот обвинител Алин Атанаси соопшти дека ќе се утврдуваат сите околности на настанот.
„Органот за кривична истрага ќе утврди дали сопственикот на животното е виновен за сторено кривично дело или смртта на малолетникот се случила исклучиво поради небрежност на лицето кое се грижело за детето“, рече тој.
Медиумите во Романија потсетуваат дека ова не е изолиран случај во земјата. Минатата година тригодишно дете настрада во канал во Вранчеа по напад од кучиња, а јавноста сè уште ја памети и големата трагедија од 2013 година, кога малиот Јонук беше убиен во Букурешт, што предизвика масовни протести.