Министерот за надворешни работи и надворешна трговија, Тимчо Муцунски, од денеска е во Анталија каде ќе учествува на петтиот Дипломатски форум (ADF2026). Настанот, под мотото „Мапирање на утрешнината: управување со неизвесностите“, се одржува под покровителство на турскиот претседател Реџеп Таип Ердоган.
Министерот Муцунски утре ќе биде еден од говорниците на панелот посветен на Балканот, каде ќе се дебатира за дијалогот и бизнис поврзаноста меѓу земјите од регионот.
„Министерот Муцунски утре ќе се обрати на панелот ‘Жнеење мир на Балканот: дијалог, бизнис и поврзаност’, на кој е предвидено учество на министри од земјите од Западен Балкан, како и од Хрватска и Турција“, информираат од МНР.
Покрај Муцунски, на форумот учествува и претседателката Гордана Сиљановска-Давкова. Таа денеска ќе се обрати на централниот „Лидерски панел“ заедно со високи претставници од Казахстан, Пакистан, Катар и Грузија. Претседателката веќе оствари средба со Ердоган во Истанбул, на која беше потврдено цврстото пријателство меѓу двете земји.
Дипломатскиот форум во Анталија годинава бележи рекордно учество на претставници од 155 земји, меѓу кои 21 шеф на држава и 61 министер.