Регионалното енергетско поврзување и подготвеноста за климатските предизвици беа главните теми на министерскиот состанок на CESEC во Загреб, каде што излагање имаше министерката за енергетика, рударство и минерални суровини, Сања Божиновска.
Божиновска порача дека регионалното опремување е од суштинско значење за долгорочната стабилност.
„Енергетската безбедност и диверзификацијата повеќе не се само стратешки опции, туку неопходност. Регионалното поврзување и заедничките вложувања се клучни за стабилно снабдување, конкурентна економија и долгорочна енергетска сигурност“, порача Божиновска.
Таа ги претстави временските рамки за изградба на гасната мрежа, според кои интерконекцијата со Грција ќе биде готова до средината на 2027 година, а конекцијата со Србија до 2028 година.
„Со вклучувањето на двата проекти во иницијативата „Вертикален гасен коридор“, Македонија станува важен дел од регионалната инфраструктура за диверзификација на снабдувањето и поврзување на енергетските пазари“, истакна Божиновска.
Реформите во секторот опфаќаат усогласување со европските правила за транспарентен и конкурентен пазар на гас. Покрај ова, беа дискутирани ефектите од електрификацијата, обновливите извори на енергија и водородната стратегија.
Во однос на заштитата на енергетските системи од временски неприлики, министерката подвлече дека е потребна поголема инфраструктурна подготвеност.
„Климатската отпорност мора да стане трет столб на енергетската безбедност, покрај сигурноста на снабдувањето и диверзификацијата. Потребни ни се енергетски системи што ќе бидат не само поврзани и ефикасни, туку и отпорни на идните предизвици“, нагласи Божиновска.