Македонија се подготвува за нови, значително построги правила за сопствениците на домашни миленици. Новиот Предлог-закон за заштита и благосостојба на животните, подготвен од Агенцијата за храна и ветеринарство (АХВ), предвидува високи парични казни и ригорозни мерки за прекршителите.
Според предлог-решението, сопственикот кој ќе го напушти својот миленик може да се соочи со трајна забрана за чување ново животно. Глобите за физичките лица се значително зголемени.
„Несоодветно чување или шетање куче ќе се казнува со околу 400 евра, додека сурово и нехумано однесување, мачење или усмртување на животни може да достигне казни до 5.000 евра“, стои во предложените измени.
Законот предвидува и забрана за постојано врзување кучиња без дневно движење, како и строга контрола на размножувањето – едно женско животно ќе може да има само едно легло годишно.
Се воведува и обврска за пријавување на леглата кај ветеринар, додека продажбата од нерегистрирани одгледувачи ќе биде ограничена. Целта е да се спречи неконтролираната трговија и да се намали бројот на бездомни животни.
Во изработката на законот учествувале АХВ, Ветеринарната комора, Факултетот за ветеринарна медицина, ЗЕЛС и организацијата „Анима Мунди“. Иако од АХВ тврдат дека предлогот е испратен на 9 април, од Министерството за земјоделство велат дека документот сè уште не е доставен до нив за владина процедура.