Со серија настани и научни трибини, денеска во земјата се одбележува 5 Мај, Денот на македонскиот јазик. Празникот официјално се празнува од 2019 година, во чест на историското решение од 1945 година со кое македонската азбука стана официјално писмо.
Современата македонска азбука се темели на кириличната азбука на Крсте Петков Мисирков, додека првиот правопис беше озаконет два месеци подоцна, на 7 јуни 1945 година.
Институтот за македонски јазик „Крсте Мисирков“ празникот ќе го одбележи со обраќања на директорката Елена Јованова-Грујовска, Кристина Николовска и архиепископот охридски и македонски г.г. Стефан. Во рамки на настанот, научниот советник Борче Арсов ќе го одржи излагањето „Од црти и рески до кирилицата: патот на македонското писмо“.
На Филолошкиот факултет „Блаже Конески“ ќе се одржи трибина посветена на состојбите во современиот јазик и неговата примена во правните акти, каде ќе учествуваат професори и експерти од повеќе институции.
Собраниската Комисија за култура и туризам, пак, ќе го одбележи јубилејот 80 години од првата „Македонска граматика“ на Круме Кепески. Покрај пратениците, за важноста на ова дело ќе говорат и универзитетските професори Димитар Пандев, Васил Дрвошанов и Јованка Кепеска.
Денешниот ден ќе биде одбележан и на ФИНКИ преку работилница за дигиталните јазични ресурси за македонскиот јазик.